Naxçıvan Muxtar Respublikası Basketbol Federasiyasının rəsmi internet saytı yenilənib

Naxçıvan Muxtar Respublikası Basketbol Federasiyasının rəsmi internet saytı yenilənib Naxçıvan Muxtar Respublikası Basketbol Federasiyasının rəsmi internet saytı müasir proqram təminatı və tərtib olunmuş alqoritm əsasında yenidən hazırlanaraq istifadəyə verilib. Bu münasibətlə ali təhsil ocağında keçirilən təqdimat mərasimində universitetin İnformasiya- Kommunikasiya Texnologiyaları və Elektron Təhsil Şöbəsinin müdiri Hüseyn Əsgərli çıxış edərək qeyd edib ki, yenilənmiş saytın əsas məqsədi müasir iş prinsiplərinin və innovativ yeniliklərin tətbiqini təmin etməkdir. Bildirilib ki, dizayn baxımından müasir tələblərə uyğunlaşdırılan saytda funksionallıq artırılıb və yeni modullar əlavə edilib. Həmçinin, saytın mobil versiyası da hazırlanıb. Qeyd edilib ki, yeni sayt “Ana səhifə”, “Haqqımızda”, “Qalereya”, “Yarış və nailiyyətlər”, “Rəhbərlik”, “Xəbərlər”, “Əlaqə” bölməsi olmaqla ümumilikdə 7 bölmədən ibarətdir. “Xəbərlər” bölməsində federasiyanın keçirdiyi tədbirlər və idman yarışlarına dair xəbərləri izləmək mümkündür. Vurğulanıb ki, “Yarış və nailiyyətlər” bölməsində keçirilən yarışlar və qazanılan nailiyyətlərlə, “Qalereya” bölməsində keçirilən yarışların fotoşəkilləri ilə tanış olmaq olar. Sual və təklifləri ünvanlamaq üçün isə “Əlaqə” bölməsindən istifadə edilə bilər. Sonra Naxçıvan Dövlət Televiziyasının hazırladığı “Kim sevirsə idmanı” verilişi təqdim olunub. Naxçıvan Muxtar Respublikası Basketbol Federasiyasının sədri Elbrus İsayev “2020-2025-ci illər üçün Naxçıvan Muxtar Respublikasında idmanın inkişafına dair Dövlət Proqramı” əsasında universitetdə idman sahəsində görülən işlərdən, ali təhsil ocağında 12 idman növü üzrə aparılan məşğələlərdən və federasiyaların fəaliyyətindən danışıb. Qeyd edilib ki, bütün idman növlərində olduğu kimi, basketbola da maraq hələ uşaq yaşlarından aşılanmalı, bu idman növünün muxtar respublikada təbliğinə diqqət artırılmalıdır. Rektor bildirib ki, ali təhsil ocağında ötən il 15 tələbə hakimlik və məşqçilik üçün təşkil edilən seminarda iştirak edib və bu il universitetdə müxtəlif növ idman yarışlarında qabiliyyətlərini sınayaraq yarışların hakimi olublar. Vurğulanıb ki, basketbol üzrə yığma komandamız ali məktəblərin universiadasında çıxış etməklə bərabər Türkiyənin Qars, Ərzurum şəhərlərində keçirilən turnirlərdə iştirak edib və uğur qazanıblar. Həmçinin vurğulanıb ki, bu idman növünün nəzəri biliklər əsasında mənimsənilməsini asanlaşdırmaq üçün ali təhsil ocağında fənn proqramı və kitab çapı nəzərdə tutulub. Elbrus İsayev diqqətə çatdrıb ki, bu gün təqdimatı keçirilən sayt gələcək fəaliyyət proqramımızın və bu idman növü üzrə təbliğatımızın əsas hissəsi olmalı və basketbolun gənc nəslə tanıtdırılması istiqamətində fəal təbliğatçımıza çevrilməlidir.